投資組合(2020/02)

今個2月美股成為焦點，美股於12日先創出歷史新高，但係最後7個交易日合計跌接近4,000點。恐慌嗎，又未至於。我認為美股連日黎下跌隨左因為肺炎影響，預期全球經濟放緩之外，還有一部份係獲利盤離場，先造成這個情景。當然幾時止跌，呢個情況則好視乎市場氣氛。

2020/2/28: $8.57買入1500股南方恆指(7200)
2020/3/2: $8.78沽出1500股南方恆指(7200)
2020/3/5: $11.34買入2000股中國奧園(3883)，繼去年指控銷售數字造假後，係前日遭受匿名指控違規自融、明股實債，究竟今次是危還是機，能否如恆大(3333)證明自己，好快自有分曉，我已投下自己一票。

本月投資組合回報為-10%，而月供組合回報為-4%，繼續以不變應萬變，滿倉跨越牛熊分解線。

富途vs華盛

在上星期一，本人開立了富途户口，亦係本人的第4個證劵户口。(2個銀行、2個證券行)

其實選擇開富途既原因主要是參與佢係19號所舉辦既贈送口罩活動，幸運地成功登記到口罩，亦係本年第一次成功地買口罩。

用過富途後，發覺比華盛好用或吸引得多，難怪係香港是最多人用劵商之一。

隨著華盛户口既開户免平台費優惠將會於本月24日完結後，本人應該只係華盛保留5萬蚊的資產，以繼續享用串流報價服務。

我簡單地比較富途及華盛，兩者的介面，apps應用，入金出方式，收費及落盤方面可謂相差無幾，但有以下差別:
1. 以開户速度計，富途只需一日，華盛則要兩日。
2. 富途有現金寶，可以存入閒置資金收息，華盛沒有提供此方面的服務。
3. 富途睇資產結餘方面簡單直接，不需輸入密碼，而輸入密碼是用作解鎖交易之用;相反華盛 需要輸入密碼才可以睇到資產結餘及交易，如果只想睇資產結餘富途是方便好多，不需每 次輸入密碼。
4. 富途日或月結單需要輸入密碼才能睇到，而華盛則唔洗。
5. 富途積分商式可換既產品多元化，有免佣種子，股票卡，周邊商品及A股報價，而華盛只有 免佣卡及報價卡，略顯單調。
6. 富途推廣活動比華盛多，華盛長期只有迎新及邀請活動。
7. 富途社交活動較華盛好，用戶發表評論較多及有種子農場。
8. 華盛存入5萬蚊有免費串流報價服務，而富途只有以前舊推廣客戶先有。

整體而言，富途功能上較華盛優勝，而華盛主要以免費串流報價及開户優惠吸引。
本人牛牛號是11316901，歡迎大家加我。

突如其來的假期

今次武漢肺炎對社會市面帶來不少的影響。

本人當然也唔例外，工作方面，公司要求放假扣年假，自春節過後，本人已放左四日假，黎緊公司也要求係未來兩星期放至少兩日假。 至於兼職方面，由於公司暫時停止其大部份業務運作，現在連工都冇得開。其實依家既放假等於變相係屋企自我隔離。

物資方面，本人一家四口現在剩返口罩唔夠1盒，希望可以捱到下個月，只好寄望到時有大量口罩供應，唔需要捱貴罩。 另外，尋日早上10點經過惠康，現在糧食方面貪源充足只缺米，廁紙及消毒用品則無留意。 本人一家都無係市面搶糧，搶米，搶廁紙，搶消毒用品，在期間只係雜貨鋪買過1包25公斤米。你話搶口罩，消毒用品我明，但搶糧，搶廁紙真係得啖笑。

股票方面，上星期以6.67買入1,500股南方恆指(7500)，諗住市跌，意想不到大市係上星期升得幾好，暫時坐艇，當對沖之用。 另外，本月月供股票有32股港鐵(0066)及53股中銀香港(2388)入賬。 業績方面，朗廷酒店(1270)嚴重下滑，其業務與香港息息相關，但是最惡劣情況應是今年上半年，由於只持有2000股，心理上可接受全部虧損。

最後，好似上篇一樣，希望武漢肺炎早日受控，經濟社會早日回復往時的繁榮。

一月結及不吐不快

隨住武漢肺炎散播速度愈來愈快，受到系統性風險影響，中港股市雙雙下挫，當中以中資股跌幅較大，投資組合回報為-16%，而月供組合為5%。在下挫期間，本人沒有選擇止蝕套現，我已有心理準備跌至50%才能見底，現在只好希望武漢肺炎能夠得以控制。

至於令我不吐不快的是政府係無能，但係點解香港依家呢個時候仲係到可以繼續爭鬧，而不係大家團結一致齊心抗疫，我已經忍左呢個局面好耐，由舊年係到搞分化，分咩藍絲黃絲五毛左膠，立法會啲所謂建制民主議員成日開會係到嘈，呢個我都算啦。更什者所謂勇武，警察過份使用暴力絕對係錯的，但唔等同你用破壞公共交通措施，倒路，燒垃圾，破壞商鋪及現在開始放炸彈來威迫無能政府作出妥協係岩既，呢啲行為同你所講黑警既行為有咩分別先。 就算被你用以上方式爭取到，人地都唔服你啦，要贏人，就要贏得心服口服。

真懷念以前既香港，可能當時社會冇現在既富裕及內地較為貧困，但當時香港人較現在無私，大愛，捨己為人，唔會斤斤計較，大家一齊努力建設這個家、這個香港，齊心抗疫沙士，而唔係好似依家日日家嘈屋閉。如果現今香港再如似下去，對香港前景更憂。

最後，寄望每名香港人可以放下敵對成見，少說話多做事，該爭取既爭取，少些爭吵破壞，大家團結一致，一起建設這個家，讓這個家繼續變得強大，而不是好似現在四分五裂。希望有朝一日可以見證香港成為一個令全世界榜樣既城市。