20年3月結

話咁快又過了一個月，在現時既市況下，組合自不其然再創新低，投資組合為負26%，而月供組合為負18%。

3月份傳統是一個業績季，12月年結的公司都需要係月底前公佈業績。因此呢個月份往往會係投資者最忙既時候，因為有唔少業績等你消化。

先略略講下倉內股份既業績:
朗廷(1270): 2019年業績嚴重受到示威活動影響，利潤及派息大幅下降，但今年情況應會更加惡劣，係示威活動加疫情雙重打擊下，預期今年業績繼續下滑。

合豐集團(2320): 2019年市場對包裝紙品需求持續下降，再加上產能過剩，設備使用率只有約一半，使其業績轉盈為虧，預期今年情況進一步惡化。

中國奧園(3883): 2019年淨利增加約6成，業績整體對辦，美中不足是因疫情影響下，管理層作出保守選擇，股息分派比率減至35%。由於會計入賬關係，未來兩年業績確保增長。管理層目標今年銷售增長12%，希望如管理層所言達到啦!

雅居樂集團(3383): 2019年業績略差，其主營業務持平且毛利下降，海南限購令對其影響不少，幸好的是，其他業務如物管，環保維持增長，使淨利仍可增加10%。 缺點是未期息分派減少，但全年分派金額如去年一樣。另外，其負債較高，不過比起最重債既中國恆大(3333)還是安全的。

匯賢產業信託(87001): 業績及分派均強差人意，係疫症及折舊入賬政策新之下，預期今年業績及派息會比去年差。幸好的是，其持有的是北京優質核心物業，相信其業務終有一天可以回復正常。

亞美能源(2686): 本人買入貪其高息，沒有深究其業務。 並2019年淨利及派息均大幅增加，至於本年會如何，在疫情及低油價之下，本人都唔識判斷，只可從其季績中觀察。

中信國際電信(1883)，業績對辦，派息輕微增加，可以繼續持有。

倉內剩番既北控水務(0371)及中國信達(1359)將會係聽日同後日公佈業績，無論成績如何，都已確保本年股息收入繼續增加，係跌市中可以靠股息黎捱日子。

在業績潮過後，市場究竟會否進入四衰五窮六絕呢，好快自有分曉。

恐慌來了

隨著肺炎在歐美等地陸續爆發，引起了一輪既大跌市。係本人既心中，中國、香港股市先於一月尾大跌，當時諗過中國停工、停課、減少外遊、出街、商業活動等既影響一環扣一環，應該會影響產業鏈及業績係中國佔有一定比重既公司，點解歐美等股市可以無咩點跌呢。

然而，到左本月初，先後有Apple、Visa、Starbucks等跨國企業陸續發出盈警及加上日韓，伊朗、意大利等歐洲國家，什至美國爆發疫症，市場終於意識到問題的嚴重性，開始恐慌性拋售及殺估值，繼2015中國熔斷機制後，我有幸於一個星期內見識到美市既熔斷機制2次，美股曾經低見21000點，而港股更創下3年新低，睇到呢個情況，本人覺得幾開心，什至有啲好笑。

雖然現在組合約虧損20幾萬，這情況係我預期之內，係疫情開始時，已有心理準備跌接近50%，Trump今早宣佈全國進入緊急狀態及撥500億美金儲備黎應對疫情，使到尾市拉升2000點。但我認為這治標不治本，真正回穩要去到疫情受控階段市況先可以，預料上半年，什至第3季度既經濟會受到嚴重影響，並可能要一段唔少既時間才能恢復。但這並不影響我投資既信心，只恨沒有巴菲特般有龐大既資金增持，可能錯失一次財富大轉移既機會。

最後，在此願疫情早日消失，人們身體健康! 困難日子終有過去的一天。